1370, 10 décembre. — Toulouse.

Marie de Bretaigne, duchesse d'Anjou et de Touraine, comtesse du Maine et dame de Guise, sçavoir faisons a touz que nous avons establi et ordenné, establissons et ordennons, par la teneur de ces presentes lettres, nostre amé frere Raoul de Caerguiniou, frere menour, porteur de ces lettres, a requerir, procurer et poursuir, tant a la court de Rome comme par tout le royaume de France, le fait de la canonization de nostre tres cher seigneur et pere, monsieur le duc de Bretaigne, et tout ce qui y sera necessaire et expedyent a la acceleration du dit fait et de ses dependences, devant toutes manieres de juges ordinaires et extraordinaires, tant d'eglise comme seculiers, et luy donnons povoir de faire poursuir et procurer toutes les chouses qu'il verra a ce convenables pour nous et en lieu de nous et aussy comme nous mesmes pourrions faire, se nous estions presentes, et promettons avoir ferme et estable, tout ce que par le dit frere sera fait, poursuy, et procuré es chouses dessus dictes et chascune d'icelles, sur testemoing de nostre scel que nous faisons mettre a ces presentes. Donné a Tholouze le diziesme jour de decembre, l'an de grace mil trois cenz soixante et diz.

Par Madame la duchesse.