1424 (Nat.), 22 mars. — Aversa.

Loys, par la grace de Dieu, etc., a touz ceulx qui ces presentes letres verront ou orront, salut.

Savoir faisons que, comme ja pieca, en ensuivant les commandemens et bons enseignemens de grant et glorieuse memoire, feu nostre redoubté seigneur et pere, Loys second roy desdiz royaumes, entre lesquelx, peu de temps avant la fin de ses jours, cognoissant par son grant sens et prudence l'abbreviacion de vie, et voulant a son povoir pourveoir a nostre bon gouvernement, nous conseilla, commanda et ordonna que deussions prendre et avoir en nostre service prouchain de nostre personne messire Pierre, seigneur de Beauvau, chevalier, lors son premier chambellan et conseiller, et, aprés son trespas, icellui retenir avecques nous esdiz offices, esperant que, ainsi que notablement et loyaulment l'avoit servi, deust faire envers nostre personne,

et aïons des pieca, nous estans ou royaume de France, retenu ledit chevalier es offices dessusdiz, et nous y ait servi pour le temps qu'il a esté environ nostre personne, et, depuis nostre venue en cest royaume de Sicile, non obstant qu'il feust absent de nostre maison, tant pour le service de monseigneur le roy que pour le nostre, l'aïons tousjours tenu et reputé pour nostre premier chambellan et conseiller,

et nouvelment soit venu devers nous a grans fraiz et despens, pour nous servir personnelment oudit royaume, ainsi qu'il nous y sert de present,

pour ce est il que nous, cognoissans les bons, grans et notables services qu'il fist a feu mondit seigneur, pour lesquelx lui porta singuliere amour entre touz autres serviteurs jusques a la fin de sadicte vie, considerans aussi la loyauté, prudence et vaillance de la personne dudit messire Pierre, et la grant affection qu'il nous porte, a icellui avons confermé, et confermons de nostre certaine science par ces presentes, la retenue par nous autrefoiz fecte de sa personne es offices dessusdiz,

et, encores, pour plus grant confirmacion, derechief par ces mesmes presentes, pour les causes et consideracions dessusdictes, et autres de ce nous mouvans, l'avons aujourd'uy retenu, et retenons en nostre premier chambellan et conseiller, aux gaiges, droiz, prouffiz, honneurs, prerogatives, excepcions, immunitez, franchises, graces, livraisons et emolumens audit office appartenans, et desquelx il avoit acoustumé de user a cause d'iceulx offices ou service de feu mondit seigneur,

duquel nostre premier chambellan et conseiller avons aujourd'uy receu en nostre propre main le serement corporel au sainctes euvangilles de Dieu, ainsi que est en tel cas acoustumé,

cassans, revocans et anullans de nostre certaine science toutes autres retenues faictes d'autre personne quelconque, de quelque estat, condicion ou degré qu'elle soit, esdit offices, et les lettres, mandemens ou commandemens sur ce faiz, soubz quelque fourme ou teneur qu'ilz soyent.

Si donnons en mandement par ces mesmes presentes a noz amez et feaulx maistres d'ostel, maistre de nostre chambre aux deniers et contrerolleur en icelle, que, ceste nostre presente retenue, ilz enregistrent ou facent enregistrer es papiers et quaternes de la despence de nostre hostel, et, lesdictes laivrisons et ordonnances acoustumé, commandent chascun en droit soy, et facent lui estre delivrees, ou a son certain comandement, es offices de nostredit hostel, par les officiers d'icelles, sans refus ou contredit aucun,

et, tant que en eulx sera nostredit premier chambellan et conseillier, facent et sueffrent joÿr et user doresenavant, plainement et paisiblement, des gaiges, droiz, proffiz, honneurs, prerogatives, emolumens et autres choses dessusdictes,

mandans aussi et commandant a touz noz autres familiers et gens de nostre hostel a qui il appartendra que, doresenavant, a nostredit premier chambellan et conseiller, ilz obeïssent et entendent diligemment, et, en toutes choses et cas qui regarderoit sesdiz offices et y appartiennent, il aient recours et refuge ainsi que en tel cas il est acoustumé de fere.

En tesmoing de ce, nous avons fait mettre nostre seau a ces presentes.

Donné a Averse le xxii jour du moys de mars l'an de grace m cccc xxiiii et de nostre regne le vii^me.

Par le roy, messire Tristan de la Jaille et messire Helion de Faulcon presens.