1371, 8 juillet. — Paris.

Loys, fils de roy de France, frere de monsieur le roy, et son lieutenant es parties de Langue doc, duc d'Anjou et de Touraine et comte du Maine,

faisons sçavoir a tous que comme par les merites et intercessions du feu le duc de Bretaingne, nostre pere, il ait pleu a nostre Seigneur faire et demonstrer plusieurs grans et apertz miracles, sur lesquielz et sur la vie et gouvernement de nostre dit pere, nostre tres Saint Pere le Pape a commis et ordenné certaines personnes pour veoir, enquerre et ouïr les tesmoings, afin que au plaisir de nostre Seigneur, il puist estre ordenné de sa canonization, par quoy est necessité que a ce fait poursuivre, ait personne abille, souffisant et diligent, et il soit ainsi que nous soïons acertainéz, que nostre cher et bon amy, frere Raoul de Kerguiniou, de l'ordre des Cordeliers, et du convent de Guingamp, auquel convent gist le corps de notre dit pere, ait tres diligeaument poursuy le dit fait au temps passé, et lequel a la connoissance des faits et miracles de nostre dit pere, et de la plus grant partie des tesmoings, qui au dit fait seront nécessaires,

nous, confians a plain du sens, loyauté, discretion et bonne diligence de sa personne, voulans et desirans la canonization et exaltation de nostre dit pere, et a l'effect de laquelle nous voulons et devons nous expouser de tout nostre pouvoir comme a nostre fait propre, avons par la teneur de ces presentes, le dit frere Raoul fait, ordenné et establi, faisons ordonnons et establissons nostre procureur general, et certain message[r] especial, quant a pourchasser, querre et assembler les tesmoings a deposer sur les miracles, vie et gouvernement de nostre dit pere, et les dits tesmoings, un ou pluseurs amener et presenter par devant les commissaires de nostre saint pere, pour leur deposition faire comme il appartendra, et a monstrer par devant les diz commissaires, instruments et toutes manieres d'autres preuves, qui valoir pourront a la approbation des dittes chouses, et a requerra deuement et raisonnablement les diz commissaires aveoir et cognoistre sur les dittes chouses, selon qu'il leur est commis et ordenné par nostre dit sainct pere, et a poursuyvre l'information faicte par les ditz commissaires, par devant nostre dit sainct pere, et par devant touz autres où mestier sera et où il appartendra, et généralement a faire, procurer et poursuir l'effect entierement de la canonization de nostre dit pere, et toutes et chascunes les chouses qui au dit fait, seront necessaires et convenables, avecques leurs dependances et circonstances, pour lesqueles faire et accomplir nous les mettons et constituons en nostre nom, et pour nous, et aurons agreable, ferme et estable, tout ce qui par luy en sera fait, et avec ce avons donné et donnons a nostre dit procureur, plein pouvoir et especial commandement de substituer et establir procureur, substitutz un ou pluseurs, qui ayent tel ou semblable povoir comme cy dessus est devisé et decleré, et yceux revoquer et rappeller, toutes fois que bon luy semblera.

Donné a Paris, le huictiesme jour de juillet, l'an mil trois cenz soizante et onze.

Par monsieur le duc.